IL-MALTA FA SSAĦĦAĦ L-IŻVILUPP TAL-PLAYERS ŻGĦAŻAGĦ PERMEZZ TA’ PROGRAMMI PERSONALIZZAT TA’ PREPARAZZJONI FIŻIKA U L-FUTSAL

Matul il-perjodu ta’ bejn l-istaġuni, il-persunal taċ-Ċentru Tekniku tal-Malta FA qed ikompli jiffoka fuq l-identifikazzjoni u l-indirizzar ta’ oqsma speċifiċi fejn il-players tat-timijiet nazzjonali taż-żgħażagħ, mill-kategorija ta’ Taħt il-15-il sena sa Taħt it-18-il sena, jistgħu jtejbu l-prestazzjoni tagħhom, sabiex kull player jirċievi appoġġ strutturat u individwalizzat.

Bħala parti mill-programm kontinwu ta’ saħħa u kondizzjoni fiżika, il-players għaddew minn sensiela komprensiva ta’ valutazzjonijiet tal-kundizzjoni fiżika matul l-ewwel ġimgħa, li koprew aspetti ewlenin bħall-qawwa, il-veloċità, ir-reżistenza u l-flessibbiltà. Barra minn hekk, saru evalwazzjonijiet nutrizzjonali segwiti minn laqgħat edukattivi mmirati biex jippromwovu drawwiet alimentari aktar b’saħħithom u jappoġġjaw l-iżvilupp ġenerali tal-players.

Abbażi tad-data miġbura minn dawn il-valutazzjonijiet, kull player se jirċievi programm ta’ taħriġ personalizzat imfassal biex jindirizza l-ħtiġijiet speċifiċi tiegħu u jkompli jiżviluppa dawn il-parametri fiżiċi matul l-erba’ ġimgħat li ġejjin. Fi tmiem dan il-perjodu, il-players se jgħaddu minn sensiela oħra ta’ testijiet sabiex jiġi mmonitorjat il-progress tagħhom u evalwati t-titjibiet miksuba.

Flimkien mal-programm ta’ żvilupp fiżiku, players mill-istess kategoriji ta’ età qed jieħdu sehem ukoll f’sessjonijiet tal-futsal immirati biex itejbu l-ħiliet tekniċi tagħhom. Dawn is-sessjonijiet qed jitwasslu b’kollaborazzjoni mad-Dipartiment tal-Futsal fi ħdan id-Dipartiment Tekniku tal-Malta FA, bil-coaches tad-dipartiment tal-futsal imexxu l-attivitajiet.

Il-futsal jipprovdi pjattaforma eċċellenti għall-iżvilupp tal-players u joffri diversi benefiċċji li jittrasferixxu direttament għall-football, fosthom kontroll aħjar tal-ballun, teħid ta’ deċiżjonijiet aktar veloċi, għarfien ta’ żmarkar u effiċjenza teknika akbar taħt pressjoni. Is-sessjonijiet jipprovdu wkoll ambjent ta’ taħriġ alternattiv u interessanti li jikkontribwixxi għat-tkabbir u l-iżvilupp ġenerali tal-players.

Permezz ta’ dawn l-inizjattivi, il-Malta FA tkompli tinvesti fl-iżvilupp ħolistiku tal-players żgħażagħ tagħha, filwaqt li tiżgura li jkunu mgħammra bil-pedamenti fiżiċi, tekniċi u edukattivi meħtieġa sabiex jilħqu u jimmassimizzaw il-potenzjal tagħhom.