Jittellgħu l-poloz tal-ewwel fażi tal-Malta FA Jubilee Cup

Il-poloz tal-Ewwel Fażi tal-Malta FA Jubilee Cup, appoġġjata minn Enemed, ittellgħu nhar l-Erbgħa, 13 ta’ Awwissu 2025, u mmarka l-bidu ta’ din il-kompetizzjoni speċjali tal-anniversarju.

Din il-kompetizzjoni, organizzata biex tiċċelebra l-125 anniversarju tal-Malta FA, se tara l-parteċipazzjoni ta’ clubs minn kull diviżjoni, kif ukoll timijiet minn assoċjazzjonijiet membri oħra. 

Il-format tal-kompetizzjoni ġie spjegat permezz ta’ filmat matul l-avveniment.

Il-poloz saru mill-Manager tal-Operazzjonijiet tal-Football tal-Malta FA, Stewart Said, flimkien ma’ David Carabott, it-tieni player bl-aktar dehriet mat-team nazzjonali u rebbieħ ta’ bosta unuri domestiċi.

Format tal-Kompetizzjoni – L-Ewwel Fażi

B’kollox hemm 45 team li se jieħdu sehem fl-Ewwel Fażi, maqsum f’erba’ gruppi: North, South, Gozo u Assoċjazzjonijiet Membri.

Sabiex ma jkunx hemm aktar minn 12-il team f’kull grupp, il-gruppi tan-North u tas-South se jibdew jilagħbu fir-round preliminari.

Logħbiet tar-Rawnd Preliminari:

North: Għargħur FC vs Dingli Swallows FC
South: Mqabba FC vs St George’s FC

Dawn il-logħbiet se jintlagħbu fit-30 u 31 ta’ Awwissu 2025, u r-rebbieħa jikkwalifikaw għal Knockout tal-Ewwel Fażi.

L-Ewwel Round:

Fl-Ewwel Round, kull wieħed mill-gruppi tan-North, tas-South u ta’ Għawdex se jkun kompost minn 12-il team li se jikkompetu biex jikkwalifikaw għat-tieni round. 

It-Tieni Round:

Fit-Tieni Round, se jintlagħbu tliet logħbiet f’kull grupp, u r-rebbieħa jikkwalifikaw għat-Tieni Fażi tal-kompetizzjoni.

Assoċjazzjonijiet Membri

Għall-Assoċjazzjonijiet Membri, it-triq hija differenti. B’kollox se  jipparteċipaw seba’ Assoċjazzjonijiet Membri, iżda l-format tagħhom huwa differenti:

Se jintlagħbu tliet logħbiet fl-Ewwel Round, b’team wieħed ikkwalifika b’mod awtomatiku għat-Tieni Round - ir-rappreżentant tal-Inter Amateur Soccer Competition (IASC).

It-Tieni Fażi u l-Finali

Wara li tispiċċa l-Ewwel Fażi, 10 timijiet se jikkwalifikaw għat-Tieni Fażi, fejn jingħaqdu magħhom il-clubs tal-Malta Premier League u taċ-Challenge League.

 

Il-kompetizzjoni  tintemm bil-finali li se tintlagħab fit-8 ta’ Diċembru 2025.