GOAL IMPEKKABBLI TA’ JAKE GRECH JISSIĠILLA REBĦA GĦAL MALTA KONTRA L-FINLANDJA

TAZZA TAD-DINJA 2026
KWALIFIKAZZJONI TAL-EWROPA - GRUPP G
14.11.2025, Olympic Stadium, Helsinki

FINLANDJA…0
MALTA…1
(HT 0-0)

82' Jake Grech (MLT)

F’lejl kiesħa f’Helsinki bit-temperatura qrib iż-żero, Malta għelbet lill-Finlandja grazzi għal goal  tard ta’ Jake Grech, u kontra kull mistenni rreġistrat  l-ewwel rebħa f’dan il-grupp ta’ kwalifikazzjoni għat-Tazza tad-Dinja 2026. Kien trijonf miksub  mill-Maltin, li lagħbu b’dixxiplina u wettqu l-pjan tattiku b’mod perfett. Malta għaddiet ukoll minn mumenti ta’ tensjoni, bil-Finlandiżi jfallu bosta ċansijiet ta’ skor u b’Henry Bonello jżomm lil sħabu fil-logħba b’sensiela ta’ interventi eċċellenti.

Ma kien hemm l-ebda sorpriża fil-formazzjoni inizjali magħżula mill-coach nazzjonali Emilio De Leo. Meta mqabbel mal-aħħar logħba kompetittiva kontra l-Olanda x-xahar li għadda fl-istess grupp ta’ kwalifikazzjoni, Zach Muscat u Paul Mbong irritornaw flok il-koppja Ryan Camenzuli u Teddy Teuma li kienu sospiżi.

Fit-tielet minuta, Malta evitat goal bikri mill-Finlandja meta Benjamin Kallmann laqat il-lasta mill-qrib wara assist tad-debuttant Ryan Mahuta, b’Henry Bonello jimblokka r-rebound tal-kaptan Joel Pohjanpalo.

Dan irriżulta li kien l-uniku mument ta’ ansjetà għall-Maltin matul l-ewwel nofs siegħa, hekk kif qasmu l-logħob mal-avversarji li huma magħrufa għal-logħob aggressiv tagħhom.Madankollu, fl-34 minuta, Pohjanpalo resaq viċin minn cross ta’ Oliver Antman. Ftit wara, Bonello wettaq save kbir fuq tentattiv ta’ Antman minn barra l-kaxxa żgħira, li l-goalkeeper ta’ Hamrun Spartans dawwar f’corner b’riflessi mill-aqwa.

Fit-tieni taqsima, l-ospiti komplew jistennew il-mumenti tagħhom b’logħob sabiħ iżda dawn ġew imwaqqfa mid-difiża Maltija. Fil-53 minuta, Bonello reġa’ daħal fl-azzjoni u dawwar f’corner xutt ta’ Kallmann b’mossa eleganti. Tliet minuti wara, Bonello reġa’ salva b’rifless mill-aqwa fuq xutt qawwi ta’ Leo Walta, forsi l-aħjar ċans għall-Finlandja.

Fis-67 minuta, Malta bniet attakk mill-aqwa li rriżulta f’corner iżda d-difiża Finlandiża nnewtralizzat tentattiv ta’ Alex Satariano. Erba’ minuti wara, fuq in-naħa l-oħra, Bonello għamel save ieħor tajjeb fuq xutt ta’ Antman lejn il-lasta. Fid-77 minuta, l-ospiti reġgħu kienu perikolużi meta s-sostitut Robin Lod, li kien żmarkat għal kollox, falla milli jolqot il-mira, b’Enrico Pepe jdawwar ix-xutt f’corner.

Tmien minuti mit-tmiem, Malta skorjat il-goal tar-rebħa. Ilyas Chouaref iddribilja fuq ix-xellug, qassam lill-sostitut Jake Grech li xeħet perfettament fir-rokna tax-xibka  minn tarf il-kaxxa, mingħajr ma ta ċans lill-goalkeeper ta’ Celtic, Viljami Sinisalo, isalva. Il-Maltin irnexxielhom jassorbu l-assedju tard tal-avversarji biex irreġistraw ir-raba’ rebħa tagħhom fl-istorja tal-kwalifikazzjoni għat-Tazza tad-Dinja, wara żewġ rebħiet identiċi 0-1 barra minn darhom kontra l-Estonja (1993) u l-Armenja (2013), u r-rebħa ta’ 3-0 ġewwa kontra Ċipru erba’ snin ilu.

F’dan il-grupp ta’ kwalifikazzjoni, Malta issa qabżet lil-Litwanja fil-klassifika tal-Grupp G tal-kwalifikazzjoni Ewropea, wara li kisbet ħames punti kontra t-tlieta tal-Litwani, li se jilagħbu kontra l-Olanda f’Amsterdam fl-aħħar partita tagħhom nhar it-Tnejn. Fl-istess lejla, Malta se tilqa’ lill-Polonja f’Ta’ Qali biex tagħlaq l-impenn tagħha tal-kwalifiki.

Finlandja
Viljami Sinisalo, Juho Lahteenmaki, Ville Koski, Miro Tenho, Ryan Mahuta (Oiva Jukkola 73), Kaan Kairinen, Adam Markhiyev (Nathan Skytta 73), Leo Walta, Oliver Antman (Topi Keskinen 78), Joel Pohjanpalo (Robin Lod 61), Benjamin Kallmann (Teemu Pukki 78).
Kowċ: Jacob Friis

Malta
Henry Bonello, Kurt Shaw, Enrico Pepe (Jean Borg 88), Zach Muscat (Gabriel Mentz 78), Juan Corbalan, Joseph Mbong (Jamie Magri Overend 65), Matthew Guillaumier, Alex Satariano, Ilyas Chouaref, Paul Mbong (Jake Grech 78), Irvin Cardona (Andrea Zammit 88)
Kowċ: Emilio De Leo

Referee
Julian Weinberger (Awstrija)