IT-TEAM NAZZJONALI TAN-NISA SE JILGĦAB ŻEWĠ PARTITI TA’ ĦBIBERIJA KONTRA L-KROAZJA BĦALA PREPARAZZJONI GĦALL-KAMPJONAT EWROPEW 2026

It-team nazzjonali tan-Nisa se jirritorna fl-azzjoni l-ġimgħa d-dieħla b’żewġ logħbiet ta’ ħbiberija internazzjonali kontra l-Kroazja, skedati għall-Ġimgħa 28 ta’ Novembru,  li tibda fis-7.00 pm u t-Tnejn, 1 ta’ Diċembru, fil-5.00 pm fis-Centenary Stadium. Iż-żewġ logħbiet se jixxandru b’mod dirett fuq TVMSport+.

Iż-żewġ logħbiet jiffurmaw parti importanti mit-tħejjija għall-fażi ta’ kwalifikazzjoni tal-Kampjonat Ewropew tas-sena d-dieħla, fejn Malta se tikkompeti f’League B2 flimkien mal-Irlanda ta’ Fuq, l-Isvizzera, u t-Turkija.

Il-coach, Manuela Tesse, qed tuża l-aħħar tieqa internaz­zjonali ta’ din is-sena biex tivvaluta l-forma tal-players, tintegra talent iżgħar, u ttejjeb l-istrutturi tattiċi qabel kampanja impenjattiva tal-2026.

Malta tidħol f’dawn il-logħbiet ta’ ħbiberija b’diversi players neqsin minħabba injury, inklużi  Haley Bugeja, Fiona Buttigieg, Jana Barbara, u Charlene Zammit, li kollha għadhom mhumiex disponibbli għall-għażla. Fuq nota pożittiva, l-attakkanta ta’ Taħt id-19-il sena, Sara Saliba, irritornat għad-dmirijiet tat-team nazzjonali tal-kbar, u żiedet mal-għażliet fl-attakk.

Il-coach Tesse enfasizzat l-importanza ta’ dawn il-logħbiet biex jinżamm ir-ritmu tal-logħba u tiġi ttestjata l-adattabbiltà kemm tal-players stabbiliti kif ukoll tal-players żgħażagħ. 

Il-logħbiet ta’ ħbiberija li ġejjin kontra l-Kroazja se jgħinu lill-coaching staff janalizza kemm l-iskwadra hija lesta qabel il-logħbiet kompetittivi tas-sena d-dieħla. Il-logħbiet huma mistennija wkoll li joffru ħin ta’ logħob prezzjuż lil players iżgħar hekk kif Malta qed tfittex li tespandi l-iskwadra u tibni l-kontinwità.

Il-partitarji huma mħeġġa li jattendu għal-logħbiet f’Ta’ Qali u jkomplu jagħtu l-appoġġ lit-team nazzjonali tan-nisahekk kif il-preparazzjonijiet għall-kalendarju internazzjonali tal-2026 jibdew jintensifikaw.

L-iskwadra proviżorja hija:

Goalkeepers
Maya Cachia (Hibernians FC), Giulia D’Antuono (Mġarr United), Patricia Ebejer (Mġarr United FC),

Difensuri
Rebecca Bajada (Mgarr United), Leanne Cefai (Mgarr United), Maia Debono (Mgarr United), Jessica Dimech (Hibernians FC), Tammy Falzon (Swieqi United), Stephania Farrugia (Birkirkara FC), Alexandra Gatt (Hull City Ladies - Ingilterra), Oceane Grange (SV Zulte Waregem - Belġju), Emma Lipman (Genoa FC - Italja), Maya Lucia (Apollon Ladies FC - Ċipru), Georgiana Mifsud (Hibernians FC), Jade Schembri (Swieqi United), Emma Xuereb (Swieqi United)

Midfielders
Brenda Borg (Mġarr United), Michaela Cachia (Swieqi United), Rachel Cuschieri (Genoa FC – Italja), Amber Grech (Mġarr United), Nicole Sciberras (Hibernians), Sarah Urpani (Swieqi United), Shona Zammit (Swieqi United)

Attakkanti
Leah Ayres (Hibernians FC), Yulya Carella (Mgarr United), Maria Farrugia (Bristol City - Ingilterra), Sara Saliba (Swieqi United), Kailey Willis (ACF Brescia Calcio Femminile - Italja)