Malta U21 se tilgħab żewg partiti ta' ħbiberija kontra San Marino

It-Team Nazzjonali Malti ta’ Taħt il-21 sena se jiffaċċja lil San Marino darbtejn fi spazju ta’ ftit jiem fil-waqfa internazzjonali ta’ Ġunju.

Iż-żewġ partiti internazzjonali ta’ ħbiberija se jintlagħbu t-tnejn fl-Istadium Ezio Conti di Dogana, f’San Marino.

L-ewwel partita se tintlagħab, nhar l-Erbgħa 4 ta’ Ġunju, fis-6.00 pm li tkun segwita minn dik ta’ nhar is-Sibt, 7 ta’ Ġunju, fl-istess ħin. 

Din se tkun it-tieni darba li t-team ta’ Taħt il-21 sena se jkun immexxi minn Davide Mazzotta. Fl-ewwel logħba tiegħu, Malta spiċċat fi draw ta’ 1-1 kontra l-Estonja. 

Il-partiti ta’ ħbiberija kontra San Marino se jipprovdu aktar esperjenza internazzjonali lill-players żgħażagħ qabel ir-round ta’ kwalifikazzjoni tal-Kampjonat Ewropew ta’ Taħt il-21sena 2025-27, fejn Malta ttellgħet biex tilgħab fi Grupp F. 

Il-grupp fih ukoll il-Ġermanja, Georgia, il-Greċja, l-Irlanda ta’ Fuq, u l-Latvja.