KONFERENZA STAMPA TAT-TEAM NAZZJONALI MALTI: NIBNU, NEMMNU U NĦARSU ‘L QUDDIEM

Fit-8 ta’ Settembru 2025, lejlet il-logħba internazzjonali ta’ ħbiberija ta’ Malta kontra San Marino, il-coach nazzjonali Emilio De Leo u l-attakkant Irvin Cardona indirizzaw konferenza tal-aħbarijiet mibnija fuq ir-realtá, ottimiżmu u professjonaliżmu.

De Leo kien ċar: “Irridu nitgħallmu minn kull logħba u niffukaw fuq il-kontinwità”—xhieda tal-identità tal-football Malti li qegħda tiżviluppa. Minkejja li konna viċin li nirbħu l-aħħar logħba iżda fallejna milli niksbu t-tliet punti,  De Leo enfasizza li l-progress ma jitkejjilx biss bir-riżultati, iżda bil-lezzjonijiet li jiġu assorbiti u r-reżiljenza li jinbnew matul dan il-vjaġġ.

Meta ġie mistoqsi dwar in-nuqqas ta’ players ewlenin—anke qabel il-logħba kontra l-Litwanja - De Leo rrikonoxxa x-xorti ħażina li kellhom, iżda faħħar lill-players li ħadu l-pass ’il quddiem: Irvin Cardona, Brandon Paiber, Myles Beerman, u Jake Grech. Huwa faħħar kif “ħadu l-okkażjoni u taw l-aħjar tagħhom,” u saħaq li kull membru tal-iskwadra huwa importanti.

Irvin Cardona, li għamel id-debutt tiegħu kontra l-Litwanja, irrifletta fuq l-ewwel dehra tiegħu: “Kienet logħba pjaċevoli. Adattajt tajjeb u nittama li din tkun biss l-ewwel waħda minn ħafna.”

De Leo ma ħeba l-ebda responsabbiltà personali. “Nieħu r-responsabbiltà iżda kulħadd għandu jagħmel dan, kemm il-players li għandhom aktar esperjenza  kif ukoll iż-żgħażagħ ġodda,” huwa qal, u sejjaħ lil kull membru tal-iskwadra biex japprezza l-vjaġġ u jkompli jaħdem. Meta rrifletta fuq il-logħba kontra l-Litwanja, huwa sostna li “m’għandniex naqtgħu qalbna u rridu nibqgħu nittamaw.” Minkejja d-diżappuntat kontra l-Litwanja huwa stqarr li t-team qed jitjieb u qed isir aktar b’saħħtu. 

De Leo ħares ukoll lejn il-logħba kontra San Marino, u appella għal konċentrazzjoni assoluta - mhux biss tattika iżda wkoll emozzjonali. Huwa wissa kontra li wieħed jissottovalwa l-importanza ta’ logħba ta’ ħbiberija. “Kull logħba hija importanti,” huwa saħaq.

Il-logħba internazzjonali ta’ ħbiberija bejn Malta u San Marino se tintlagħab, it-Tlieta,  fid-9.00 pm, fl-Istadium Nazzjonali, f’Ta’ Qali u se tixxandar diretta fuq TVM Sport+.