GOAL FL-AĦĦAR SEKONDI JASSIGURA RIMONTA EĊĊITANTI TA’ 4-3 GĦAL MALTA KONTRA L-ISKOZJA

FIFA FUTSAL WORLD CUP QUALIFIERS - PRELIMINARY ROUND
11.04.2026
Park Vendia Hallen, Hjorring, Danimarka

SKOZJA...3
MALTA...4

Malta pproduċiet prestazzjoni eċċitanti u drammatika biex kisbet rebħa impressjonanti ta’ 4-3 kontra l-Iskozja f’logħba mimlija intensità, bidliet fil-momentum u drama sal-aħħar sekondi.

Il-logħba kellha bidu diffiċli għal Malta hekk kif l-Iskozja marru fil-vantaġġ fil-11-il minuta meta sfortunatament Marrwan Telisi kkommetta auto-goal. Madankollu, Malta wriet karattru u reżiljenza immedjata, u wieġbet ftit mumenti wara permezz ta’ Nathan Cope, li temm azzjoni biex kiseb id-draw u naqqas in-nevożiżmu.

Iż-żewġ timijiet komplew jattakkaw f’konfront miftuħ u divertenti. L-Iskozja reġgħu ħadu l-vantaġġ f’nofs it-taqsima meta Kai Lawless sab ix-xibka wara pressjoni kontinwa, iżda għal darb’oħra Malta ma ċedietx. Celino Alves ħa r-responsabbiltà u skorja goal importanti biex għamilhom 2-2, u b’hekk iż-żewġ timijiet daħlu jistrieħu f’paritá.

It-tieni taqsima segwiet l-istess andament, bl-Iskozja jerġgħu jmorru fil-vantaġġ. Chris Angus għamilhom 3-2, u poġġa lil Malta taħt pressjoni ġdida hekk kif il-logħba daħlet fl-istadji deċiżivi. Minkejja dan, Malta kompliet turi determinazzjoni u baqgħet tippressja fit-tfittxija għall-goal tad-draw.

Dak il-mument wasal lejn l-aħħar meta Telisi patta għall-iżball tiegħu tal-bidu billi skorja t-tielet goal ta’ Malta, u għamel l-iskor 3-3 ... għall-final drammatiku. Meta deher li l-logħba kienet sejra tispiċċa fi draw, il-Maltin skorjaw dak li kellu jkun il-goal tar-rebħa.  Maikinho kien l-eroj, u skorja l-goal deċiżiv fl-aħħar sekondi biex issiġilla rimonta memorabbli fost ċelebrazzjonijiet fost il-players Maltin.

Il-goalkeeper Marmara kellu wkoll rwol kruċjali matul il-logħba, u għamel diversi saves importanti biex żamm lil Malta fil-logħba, speċjalment waqt perjodi ta’ pressjoni kontinwa mill-Iskozja.

Dan ir-riżultat jimmarka l-ewwel rebħa ta’ Malta fil-kompetizzjoni, wara telfiet preċedenti kontra d-Danimarka (5-1) u Andorra (5-0), u jirrappreżenta spinta kbira fil-kunfidenza għat-team.

Skozja
O’Hanlon, Ritchie, Smith, Angus, Aloulou, Grant, Lawless

Malta
Marmara, Telisi, C. Alves, Gatt, M. Borg, C. Sammut, Cope, Maikinho, Buhagiar

Referees:
Referee: Ayberg Öz (TUR)
Second Referee: Hakan Tezcan (TUR)
Third Referee: George Jansizian (SWE)
Timekeeper: Magnus Tvilling Rasmussen (DEN)

Miktub minn Robert Busuttil