MALTA MEGĦLUBA MIS-SLOVAKKJA B’GOAL TARD FIL-ĦIN MIŻJUD

International ‘A’ Friendly 
01.06.2026, MOL Arena, Dunajska Streda 
 
SLOVAKKJA…2 
MALTA…1 
(HT 1-1) 
 
9' Haraslin (SVK), 37' J.Mbong (MLT), 90+7' Galik (SVK)

Malta sofriet diżappunt kbir fl-aħħar mumenti tal-partita tat-Tnejn filgħaxija hekk kif is-Slovakkja kisbet rebħa ta’ 2-1 b’goal prattikament bl-aħħar azzjoni tal-logħba f’partita ta’ ħbiberija internazzjonali. Ir-riżultat ċaħħad lill-Maltin minn draw prestiġjuż kontra avversarji li jinsabu aktar minn 100 post ’il fuq fir-Rankings tal-FIFA.

Minkejja li s-Slovakkja kkontrollaw partijiet kbar tal-logħba, Malta pproduċiet prestazzjoni dixxiplinata u reżiljenti, bil-goalkeeper Henry Bonello jerġa’ jkun protagonist grazzi għal sensiela ta’ saves eċċellenti. Madankollu, il-players tat-team ospitu skorja il-goal tar-rebħa fil-ħin miżjud. 

Il-coach tat-team nazzjonali Emilio De Leo għamel diversi bidliet mit-team li lagħab kontra l-Lussemburgu f’Marzu, kif spiss jiġri f’partiti ta’ ħbiberija internazzjonali. Id-difensur ta’ Zabbar St Patrick, Kean Scicluna, ingħata l-ewwel bidu tiegħu mat-team nazzjonali fit-tieni dehra biss tiegħu ma’ Malta, fejn lagħab flimkien ma’ Kurt Shaw fiċ-ċentru tad-difiża.

Keyon Ewurum ukoll ġie ppremjat bl-ewwel bidu tiegħu fit-tielet dehra internazzjonali, appoġġjat fl-attakk minn Ilyas Chouaref u Joseph Mbong. Zach Muscat, li bħalissa jilgħab ma’ Chaves u kien qed jagħmel il-81 dehra tiegħu mat-team nazzjonali, kien l-aktar player b’esperjenza fil-formazzjoni Maltija, filwaqt li Matthew Guillaumier mexxa lit-team bħala captain għat-23 darba. Fit-tieni taqsima wkoll għamlu d-debutt tagħhom il-winger ibbażat fl-Italja Kevin Cannavò u d-difensur ta’ Birkirkara Aleandro Garzia.

Bonello ġie msejjaħ fl-azzjoni kmieni sa mis-sitt minuta meta salva b’mod mill-aqwa tentattiv mill-viċin ta’ Tomas Suslov. Tliet minuti wara, iżda, is-Slovakkja fetħu l-iskor permezz ta’ Lukas Haraslin, li temm azzjoni maħduma tajjeb mibdija mill-captain Ondrej Duda. Malta rreaġixxiet tajjeb u kienet qrib li ġġib id-draw fl-14-il minuta meta Ewurum ipprova xutt imdawwar li għadda ftit barra minn pożizzjoni ideali.

Is-Slovakki komplew joħolqu l-periklu u resqu viċin li jirdoppjaw f’nofs l-ewwel taqsima. Laszlo Benes ra x-xutt tiegħu jiġi mblukkat qabel David Strelec ħela opportunità tad-deheb ftit wara, meta x-xutt tiegħu minn distanza qasira spiċċa direttament f’idejn Bonello, li rreaġixxa tajjeb.

L-insistenza ta’ Malta tat il-frott fis-37 minuta. Chouaref sab lil Muscat fuq il-lemin, u d-difensur xeħet cross preċiż fil-kaxxa fejn Mbong ikkontrolla l-ballun qabel spara fix-xibka mill-viċin biex kiseb il-paritá. 

Ftit wara, il-Maltin kienu kważi għamlu rimonta sħiħa. Chouaref reġa’ ħoloq il-problemi fuq il-lemin fejn sab lil Ewurum, li t-tentattiv tiegħu ġie mdawwar f’corner. Fuq in-naħa l-oħra, Bonello baqa’ f’forma eċċellenti hekk kif l-ewwel salva xutt ta’ Adam Obert u mbagħad wettaq save ieħor mill-aqwa minn daqqa ta’ ras ta’ Robert Bozenik wara l-corner sussegwenti.

It-tieni taqsima kienet aktar bilanċjata, b’Malta taqsam il-logħob mas-Slovakki għal perjodi twal filwaqt li l-ospitanti sabuha diffiċli biex iżidu r-ritmu tal-logħba. Suslov ittestja lil Bonello fl-54 minuta, iżda l-goalkeeper Malti salva mingħajr diffikultà. Ftit wara s-siegħa logħob, is-sostitut Enrico Pepe pprova xortih b’xutt mid-distanza, iżda t-tentattiv tiegħu ma kellux il-preċiżjoni meħtieġa biex joħloq problemi lil Dominik Takac.

L-aqwa opportunità ta’ Malta fit-tieni taqsima waslet fis-77 minuta. Kontrattakk veloċi fetaħ lid-difiża Slovakka, b’Cannavò jqassam il-ballun lejn Andrea Zammit, li x-xutt imdawwar tiegħu għadda jħakkek mal-lasta. 

Hekk kif il-logħba kienet riesqa lejn tmiemha, is-Slovakkja bdew jagħfsu għall-goal tar-rebħa. Bozenik ħela żewġ opportunitajiet tard fil-logħba, filwaqt li Peter Kovacik laqat il-lasta b’xutt imdawwar fil-bidu tal-ħin miżjud.

Meta kollox deher li Malta kienet se tikseb riżultat prestiġjuż, wasal il-mument deċiżiv fis-seba’ minuta tal-ħin miżjud. Adrian Kapralik sab b’passaġġ intelliġenti lil Roland Galcík, li spara xutt dijagonali fil-baxx biex għeleb lil Bonello biex ta r-rebħa lis-Slovakkja.

Issa Malta tivvjaġġa lejn il-pajjiż ġar tal-Ungerija, fejn nhar il-Ġimgħa se taffaċċja lill-Azerbaijan f’partita oħra ta’ ħbiberija internazzjonali f’Szombathely, fit-8.00pm.

Slovakkja
Dominik Takac, Hugo Pavek (Peter Kovacik 80), Martin Valjent (Michal Fasko 80), Lubomir Satka (Krisztian Bari 80), Adam Obert, Peter Pokorny (Matus Bero 46), Laszlo Benes (Adrian Kapralik 46), Ondrej Duda (Artur Gajdos 67), Tomas Suslov (Roland Galcik 67), David Strelec (Robert Bozenik 40), Lukas Haraslin (Mario Sauer 67).
Coach: Vladimir Weiss

Malta
Henry Bonello, Zach Muscat (Gabriel Mentz 59), Kurt Shaw (Jean Borg 90+4), Kean Scicluna (Enrico Pepe 46), Juan Corbalan (Myles Beerman 46), Matthew Guillaumier (Jake Grech 90+4), Teddy Teuma (Brandon Paiber 59), Alex Satariano (Andrea Zammit 59), Ilyas Chouaref (Aleandro Garzia 74), Keyon Ewurum (Kevin Cannavo’ 46), J.Mbong (P.Mbong 46). 
Coach: Emilio De Leo

Referee: Mihaly Kapraly (Hungary)

Yellow cards: Duda, Suslov (SVK); Corbalan, Muscat, Bonello (MLT).

Attendance: 2741