DE LEO U EWURUM IĦARSU ‘L QUDDIEM GĦAL-LOGĦBA KONTRA S-SLOVAKKJA

Lejlet il-logħba ta’ ħbiberija internazzjonali ta’ Malta kontra s-Slovakkja, il-coach nazzjonali, Emilio De Leo, u ż-żagħżugħ Keyon Ewurum indirizzaw lill-media.

Sandanittant Irvin Cardona ma ngħaqadx mal-iskwadra wara li sofra injury waqt il-play-off mat-team tiegħu.

De Leo rrikonoxxa l-isfida li Malta se tiffaċċja kontra t-team qawwi Slovakk filwaqt li enfasizza fuq il-kwalità tagħhom kif ukoll il-motivazzjoni li se jġorru fil-logħba.

“Is-Slovakkja ġejjin minn bidla fil-coach, għaldaqstant se jkun hemm players ħerqana li jippruvaw lilhom infushom u juru t-talent tagħhom,” qal De Leo. “Li jilagħbu quddiem il-partitarji tagħhom se jkun ukoll motivazzjoni kbira għalihom.”

Il-coach ta’ Malta enfasizza li l-players tiegħu jridu jqumu għall-okkażjoni kontra avversarji kklassifikati ogħla fir-rankings tal-FIFA b’mod konsiderevoli.

“Ninsabu konxji mill-fatt li se niffaċċjaw team tajjeb ħafna, iżda għandna wkoll grupp li jippossiedi talent qawwi. Jeħtieġ li l-players  juru l-kwalità tagħhom, jibqgħu bilanċjati u jagħtu prestazzjoni qawwija.”

Waqt il-konferenza stampa, ġurnalisti Slovakki rreferew għar-rebħa memorabbli ta’ Malta kontra l-Finlandja taħt il-gwida ta’ De Leo — riżultat li l-coach iddeskriva bħala wieħed mill-aktar mumenti ta’ kburija tiegħu fit-tmexxija.

“Dak żgur kien sodisfazzjon kbir,” huwa qal. “Imma rridu niftakru wkoll li, partikolarment kontra l-Polonja, forsi stajna ħadna aktar mil-logħba.

“L-importanti hu li nkomplu nibnu fuq ix-xogħol tajjeb li wrejna f’dak ir-round ta’ kwalifikazzjoni.”

De Leo faħħar ukoll il-livell ġenerali tas-Slovakkja, u żied jgħid li kienu sfortunati li ma assigurawx il-kwalifikazzjoni għat-Tazza tad-Dinja tal-FIFA.

Meta mistoqsi x’kien jissodisfah l-aktar mil-logħba tal-lum, il-coach irrefera għall-attitudni u l-identità tat-team fil-ground.

“Jekk it-team juri li aħna kompatti, bilanċjati, nemmnu fina nfusna, qatt ma naqtgħu qalbna u ma nibżgħux mill-avversarji tagħna, allura nkun sodisfatt,” huwa spjega. “Irridu nkunu organizzati, kuraġġużi u nafdaw fl-abbiltajiet tagħna.”

De Leo enfasizza wkoll il-preżenza ta’ diversi players żgħażagħ fl-iskwadra, u semma’ lil Ewurum bħala wieħed mit-talenti ħerqana li jagħmlu impressjoni.

“Għandna ħafna players żgħażagħ bir-rieda li jibbrillaw, u din hija l-pjattaforma għalihom biex jagħmlu dan.”

Ewurum tenna l-messaġġ tal-coach tiegħu, fejn iddeskriva l-logħba ta’ ħbiberija tal-lum bħala test importanti qabel il-logħbiet li ġejjin kontra Andorra u Ġibiltà.

“Dan huwa test tajjeb ħafna għalina qabel dawn il-logħbiet, li huma eqreb lejna f’termini ta’ klassifika,” qal Ewurum. “Nafu għaliex qegħdin hawn, nafu x’għandna nagħmlu u x’irridu niksbu.”

L-attakkant żagħżugħ temm fuq nota kunfidenti.

“Aħna qegħdin hawn biex nagħtu l-almu tagħna — u jekk nistgħu niksbu riżultat tajjeb ... din tkun iċ-ċirasa fuq il-kejk.”