IL-MALTA FA TIKKOLBORA MAL-ORKESTRA MUSEA GĦAL VIDEO MUŻIKALI BIEX TAGĦLAQ SENA STORIKA LI TFAKKAR IL-125 ANNIVERSARJU TAGĦHA

Il-Malta Football Association nediet video mużikali ġdid b’kollaborazzjoni ma’ Musea Orchestra biex tagħlaq il-125 anniversarju storiku tal-assoċjazzjoni.

Musea Orchestra hija fornitur ta’ servizz sħiħ fis-settur tal-mużika li tuża l-kompetenza profonda u s-sengħa raffinata tagħha, speċjalizzata fit-twassil ta’ soluzzjonijiet mużikali metikolużi u personalizzati biex tappoġġja kreaturi u istituzzjonijiet f’setturi differenti.

Il-kollaborazzjoni bejn il-Malta FA u Musea Orchestra bdiet aktar kmieni f’Diċembru b’kampanja fuq il-media soċjali li ratha tippromwovi l-video mużikali, intitolat Stronger as One.

Il-kanzunetta li tindaqq fil-video mużikali hija verżjoni orkestrata ta’ kanzunetta motivaz­zjonali, Hall of Fame, li oriġinarjament ġiet rilaxxata mill-band pop rock Irlandiża, The Script, li tgħin biex tevoka l-istess emozzjoni li tintwera fil-ground tal-football u li dejjem tippersisti meta wieħed isegwi l-għanijiet tiegħu.

Il-video jaqbad il-mod kif il-football u l-mużika huma magħqudin permezz tad-dedikazzjo­ni, il-passjoni, u l-isforz kostanti għat-titjib, minkejja li huma żewġ dixxiplini minn żewġ dinjiet kompletament differenti.

Fil-filmat, l-orkestra talentuża ta’ 30 persuna timla l-Istadium Nazzjonali b’mużika vibranti, filwaqt li team ta’ stilel tat-team nazzjonali ta’ Malta jinżlu fil-ground għal wirja kommemorattiva unika.

F’kumment dwar il-kollaborazzjoni, il-pre­si­dent tal-Malta FA Bjorn Vassallo stqarr:

“Din il-kollaborazzjoni, fil-125 anniversarju tal-Malta FA, tenfasizza l-kapaċitá u l-kreatti­vità tal-maestro permezz tal-orkestra, kif ukoll it-talent li għandna fit-timijiet nazzjonali tagħna, li jirrappreżentaw lil pajjiżna u lin-nazzjon kollu.”

“Huwa fatt li s-sinerġija u l-entużjażmu tal-orkestra, flimkien mal-kburija tat-timijiet nazzjonali tagħna, iwasslu għall-ferħ tal-popolazzjoni Maltija. Għalhekk, huwa ta’ sodisfaz­zjon kbir għalina li kkollaborajna mal-Orkestra ta’ Musea fuq dan il-proġett,” huwa saħaq.

Min-naħa tiegħu, il-Konduttur tal-Orkestra ta’ Musea, il-Maestro Matthew Bugeja, irrimarka: “Huwa unur ġenwin li nikkollaboraw mat-timijiet nazzjonali tal-football ta’ Malta fuq proġett li jenfasizza l-valuri komuni ta’ eċċellenza li jorbtu l-isport u l-mużika.”

“Fiż-żewġ oqsma, is-suċċess jinbena fuq id-dixxiplina, il-ħidma f’team, u rispett profond għas-sengħa u għal xulxin. Li nidderieġu l-Orkestra tal-Musea fil-ground tal-Istadium Nazzjonali, mat-timijiet nazzjonali, kien ifisser li nwettqu ħolma,” kompla jgħid.

“Irrid infaħħar lit-tmexxija tal-Malta FA għall-approċċ progressiv tagħha u għar-rikonox­ximent tal-impatt li jġib l-espressjoni artistika u l-isport nazzjonali f’narrattiva magħquda. 

“L-orkestra tagħna hija onorata li tikkontribwixxi għal inizjattiva daqshekk innovattiva u sinifikanti fuq livell nazzjonali, li tiċċelebra valuri universali,” temm jgħid.