Il-Malta FA takkwista ktieb uniku bil-firem ta' aktar minn 230 player attwali u dawk passati tat-team nazzjonali

Imwaqqfa fl-1968, Caritas Malta hija aġenzija li tfittex li ttaffi l-faqar u tippromwovi l-iżvilupp uman u l-ġustizzja soċjali fil-komunità.

Iċ-ċerimonja tad-donazzjoni, li tifforma parti miċ-ċelebrazzjonijiet tal-125 anniversarju tal-Assoċjazzjoni Maltija tal-Football, rat lill-istess Assoċjazzjoni tagħti donazzjoni ta’ €5,000 lill-aġenzija, filwaqt li takkwista ktieb uniku tal-firem b’mod reċiproku.

Il-ktieb, li huwa rreġistrat uffiċjalment minn nutar u msejjaħ ‘Malta All-Time National Football Players’, huwa inizjattiva li tnediet mill-eks player tat-team nazzjonali, Jimmy Briffa.

B’kollox fih 234 firma minn players attwali u dawk passati tat-team nazzjonali bl-ewwel waħda tkun tal-player leġġendarju Joe Cini.

Is-Sur Briffa ddedika ammont sinjifikanti ta’ ħin u sforz biex jiġbor dawn il-firem u jikkompila dan il-ktieb, u b’hekk dan jagħmilha vetrina eċċellenti tal-istorja rikka tal-football ta’ Malta.

Iċ-ċerimonja saret fil-Mużew tal-Football tal-Malta FA fil-preżenza ta’ uffiċjali tal-Malta FA, immexxija mill-President Bjorn Vassallo. Kien hemm ukoll l-eks players tat-team nazzjonali, Joe Cini u Miguel Mifsud preżenti, kif ukoll rappreżentanti minn Caritas Malta, inkluż il-Kap Eżekuttiv, Anthony Gatt. Preżenti wkoll kien hemm Antoinette Vassallo, mart il-mibki Willie Vassallo, eks player ta’ Gzira United, Floriana u tat-team nazzjonali Malti.

Iċ-ċerimonja bdiet bi żjara fil-Mużew tal-Football ta’ Malta, li ppermettiet lir-rappreżentanti ta’ Caritas Malta jitgħallmu aktar dwar l-istorja u l-importanza tal-football fil-Gżejjer Maltin.

Il-ktieb ingħata lis-Sur Cini, li mbagħad poġġieh f’vetrina fil-Mużew tal-Football ta’ Malta.

Il-President Vassallo esprima gratitudni f’isem il-Malta FA għal din l-inizjattiva, u stqarr li din se żżid valur kbir lill-Mużew tal-Football ta’ Malta, u tkompli żżida l-kollezzjoni vasta tagħha ta’ tifkiriet.

Is-Sur Gatt irringrazzja lis-Sur Briffa għat-tiswir tal-ktieb u lill-Malta FA għall-att ta’ solidarjetà tagħha favur individwi li qed jaħdmu ħafna fuq ir-rijabilitazzjoni tagħhom.

L-avvenimenti tal-125 Anniversarju tal-MFA  huma mmirati lejn inizjattivi li jistgħu jħallu marka fir-responsabbiltà soċjali u l-inklużjoni fil-komunità tagħna.