16-IL COACH JINGĦATAW ID-DIPLOMA UEFA PRO WARA LI TEMMEW IL-KORS 2023-2025 B’SUĊĊESS

It-Tnejn filgħaxija, il-parteċipanti tat-tielet edizzjoni tal-Kors UEFA Pro ingħataw id-diploma l-ġdida tagħhom ta’ coaching, li mmarkat it-tlestija b’suċċess tal-ogħla kwalifika ta’ coaching offruta mill-Malta FA u mill-UEFA.

L-avveniment, li sar fiċ-Ċentru Nazzjonali tal-Football f’Ta’ Qali, ra 16-il coach parteċipant jirċievu ċ-ċertifikati kommemorattivi tagħhom wara li temmew il-kors.

Din l-edizzjoni tal-Kors tad-Diploma UEFA Pro, li saret bejn l-2023 u l-2025, kienet tinkludi taħlita ta’ sessjonijiet intensivi ta’ edukazzjoni għall-coaches kemm teoretiċi kif ukoll prattiċi, imfassla biex jipprovdu lill-parteċipanti l-għarfien u l-esperjenza meħtieġa biex iħarrġu fl-ogħla livelli tal-football f’Malta u madwar l-Ewropa.

Il-kors kien mifrux fuq żewġ staġuni tal-football u kien jikkonsisti f’430 siegħa ta’ tagħlim u esperjenzja regolati mill-Konvenzjoni tal-Coaching tal-UEFA. Matul il-kors, il-parteċipanti esploraw l-aspetti ewlenin kollha tal-coaching tal-football f’ambjent ta’ tagħlim li ħeġġeġ in-networking, l-iskambju ta’ esperjenzi u d-diskussjoni ta’ ideat prattiċi relatati mal-football flimkien ma’ istrutturi lokali u barranin kwalifikati mill-UEFA.

Waqt li kien qed jindirizza lill-attendenti, il-Viċi President Anzjan tal-Malta FA, Dr Matthew Paris, feraħ lill-parteċipanti għal dan il-pass importanti fil-karriera tagħhom u rringrazzjahom għall-impenn tagħhom lejn il-logħba.

“L-edukazzjoni kontinwa għandha tkun fiċ-ċentru tal-karriera tagħkom. Il-football qed jevolvi b’pass mgħaġġel: it-tattiċi, ix-xjenza sportiva, l-analiżi tad-data u l-benesseri tal-players qed jinbidlu kontinwament. Impenjaw ruħkom fit-tagħlim tul il-ħajja – aqraw, osservaw, staqsu mistoqsijiet, attendu korsijiet u kkollaboraw mal-kollegi tagħkom. Fittxu perspettivi differenti u żommu l-kurżità tagħkom ħajja. L-aqwa coaches huma studenti tal-logħba, dejjem jadattaw u jtejbu lilhom infushom,” qal Dr Paris.

Dr Paris sostna li huwa vitali li dawn il-coaches jibqgħu dedikati, idawru ruħhom b’network b’saħħtu ta’ appoġġ, jiddelegaw meta jkun meħtieġ u jżommu bilanċ sabiex ikunu jistgħu jgawdu karriera twila.

Il-Kap tal-Edukazzjoni tal-Coaches tal-Malta FA, Herman Bugeja, irringrazzja lill-parteċipanti għall-vjaġġ sabiħ ta’ tagħlim, li kien ta’ ġid kemm għall-parteċipanti kif ukoll għall-edukaturi.

“Irridu nkomplu nħeġġu aktar coaches biex javvanzaw permezz tal-mogħdija lokali, jieħdu rwoli ta’ tmexxija fil-kampjonati tagħna u anke jfittxu opportunitajiet barra minn Malta. Il-coaches tagħna għandhom jemmnu li jistħoqqilhom ikunu fuq palk akbar – mhux b’kumbinazzjoni, iżda permezz tal-kompetenza u l-impenn tagħhom. Il-professjonalità mhijiex definita minn fejn ġejt; hija definita mill-mod kif tħarreġ,” qal Bugeja.

Huwa żied li mal-professjonalità tiġi wkoll ir-responsabbiltà li wieħed ikompli jitgħallem, jinvolvi ruħu fl-iżvilupp professjonali kontinwu u jiggwida lill-ġenerazzjoni li jmiss ta’ coaches.

Brian Said, li tkellem f’isem il-parteċipanti, esprima l-gratitudni tiegħu lejn il-coach Bugeja talli mhux biss mexxa l-kors, iżda wkoll serva bħala mentor, jiggwida u jħeġġeġ lill-parteċipanti jiddiskutu u jisfidaw lil xulxin.

“Nifraħ lill-coaches kollha li kisbu d-Diploma UEFA Pro, għaliex issa għandna r-responsabbiltà miżjuda li nuru li aħna coaches b’din il-kwalifika fil-mod kif inħarrġu, naġixxu, inġibu ruħna u nibnu relazzjonijiet mal-players tagħna, mal-istaff tekniku u mal-membri tal-clubs,” qal is-Sur Said, filwaqt li żied li matul il-kors saru grupp magħqud ta’ coaches.

“Nixtieq nirringrazzja lill-Malta FA talli għamlet dan kollu possibbli u tatna l-opportunità niksbu din il-kwalifika hawn Malta. Ringrazzjament speċjali jmur ukoll lejn il-letturi u l-kelliema mistiedna li kienu preparati sew, motivati u involvuti matul il-kors,” żied jgħid Said.

Il-Malta FA tifraħ lill-parteċipanti kollha talli temmew b’suċċess il-Kors tad-Diploma UEFA Pro u tawguralhom kull suċċess fil-fażi li jmiss tal-karriera tagħhom bħala coaches.

Il-lista sħiħa tal-parteċipanti tal-Kors tad-Diploma UEFA Pro 2023-2025 hija kif ġej:

-Orosco Anonam
-Danijel Bogdanovic
-Andrew Cohen
-Saviour Debono Grech
-Jean Paul Desira
-Pablo Cesar Doffo
-Hugo Faria
-Joseph Galea
-Jonathan Holland
-Francesco Macri
-Ryan Pulis
-Brian Said
-Andre Schembri
-Darren Vella
-Etienne Vella
-Alessandro Zinnari